ABŞ-nyň Prezidenti Donald Tramp Gaza ýaraşygyny ýola goýmak ugrundaky tagallalary üçin Türkiyäniň Prezidenti Rejep Taýýip Erdogana minnetdarlyk bildirdi.
ABŞ-nyň Prezidenti Donald Tramp duşenbe güni Şarm al-Şeýhde geçirlen gol çekişlik dabarasynda çep tarapynda Erdogan, sag tarapynda Müsüriň we Kataryň ýolbaşçylary oturmaklaryna garamazdan: "Türkiye diýilýän ýerden gelen bu jenap adamyň hakykatdanam dünýäde iň güýçli goşunlarynyň birine eýedigini aýtmalydyryn. Hatda şol güýç, onuň aýdýanyndan hem has köp” diýip belledi.
“Ol kyn bir adam, ýöne ol meniň dostum we maňa gerek wagty hemişe meniň ýanymda boldy. Şonuň üçin Türkiyäniň prezidenti Erdogana sag bolsun aýdasym gelýär" diýip bellän Tramp Erdoganyň "özlerini asla ýary ýolda taşlamandygyny" belläp, ony "ajaýyp" adam hökmünde häsýetlendirdi we uzak wagtdan bäri dowam edip gelýän dostluklary üçin minnetdarlyk bildirdi.
Gazanyň ýaraşyk şertnamasy
Gaza ýaraşyk şertnamasynyň birinji tapgyry, Trampyň iki ýyllyk Ysraýyl-Gaza söweşini bes etmek meýilnamasynyň çäginde anna güni güýje giripdi.
Duşenbe güni irden Hamas bilen Ysraýylyň arasynda tussag alyş-çalşygy amala aşyryldy. Palestinaly ýüzlerçe tussagly Ysraýylyň meşhur Ofer harby tussaghanasyndan we Negew çölündäki beýleki tussaghanalardan boşadyldy. Olaryň deregine bolsa diri ýagdaýda bolan ysraýylly 20 zamun boşadyldy.
Tramp ýesirlikde ölen zamun alnanlaryň jesetlerini tapmak üçin tagallalaryň edilýändigini belläp: "Nirededigini bilýärler, meniň pikirimçe şu wagt bäş ýa-da alty adam tapyldy" diýdi.
Tramp: "Olar jesetleri gözleýärler. Sebitleri bilýärler we şol ýerlerde gözleg toparlary bar. Ysraýyl bilen hyzmatdaşlykda işleýärler we örän köp jeset taparlar" diýdi.
2023-nji ýylyň oktýabr aýyndan bäri Ysraýylyň hüjümleri sebäpli Gazada aglabasy zenanlardan we çagalardan ybarat bolmak bilen 67800-den gowrak palestinaly ýogaldy we sebit umuman alnanda ýaşap bolmajak ýagdaýa geldi.
