Türkiyäniň prezidenti Taýýip Erdogan ABŞ-nyň prezidenti Donald Tramp bilen geçiren telefon arkaly söhbetdeşliginde Nikolas Maduronyň zamun alynmagyndan soň Wenesuelanyň durnuksyzlyga sezewar edilmeli däldigini aýtdy.
Duşenbe güni Ministrler Kabinetiniň mejlisinden soň eden çykyşynda Erdogan özygtyýarly hukuklaryň we halkara hukugyň düzgünleriniň bozulmagynyň global derejede çynlakaý kynçylyklara sebäp bolup biljek howply ädimlerdigini aýtdy.
“Türkiye halkara hukugyny bozýan hiç bir hereketi makullamaýar” diýip aaýdan prezident Erdogan Ankaranyň hem Türkiye, hem-de dostlukly Wenesuelanyň halky üçin iň gowy bolan zady etmäge tagalla edýändigini beýan etdi.
Prezident Erdogan Türkiyäniň we türk halkynyň dostlukly Wenesuelanyň halkynyň abadançylygy, parahatçylygy we ösüşi ugrundaky göreşinde olary goldamaga dowam etjekdigini aýdyp: “Hormatly Maduro we Wenesuelanyň halky biziň milletimiziň dostlarydygyny köp gezek görkezdiler” diýdi.
Erdogan şeýle hem düzgünlere esaslanýan halkara düzgüniň goralyp saklanmagynyň möhümdigini nygtady.
Prezident Erdogan Türkiyäniň adalaty, kanunylygy we halkara hukugyny goraýan dünýäde öňdebaryjy ýurtlaryň biridigini aýtdy.
ABŞ Madurony we onuň aýalyny şenbe güni irden harby bazadaky öýlerinden zamun alyp, Nýu-Ýorkda kazyýetiň öňüne çykarmak üçin ABŞ-nyň harby gämisine mündürdi. ABŞ-nyň Adalat ministrliginiň aýyplamasyna görä, Maduro we onuň aýaly neşe serişdeleriniň bikanun dolanyşygyna gatnaşmakda aýyplanýar.
Maduro duşenbe güni Manhettende ilkinji gezek kazynyň öňüne çykdy we ABŞ tarapyndan oňa garşy ýöňkelen ähli aýyplamalary ret etdi.
Tramp ABŞ-nyň Wenesuelany wagtlaýyn dolandyrjakdygyny we ýurduň ägirt uly nebit gorlaryny başga ýurtlara satmak üçin ulanjakdygyny aýdýar.
