Türkiýe Respbulikasynyň Prezidenti R. T. Erdogan, Gazanyň gysga wagtda gaýtadan dikeldilmeginiň möhümdigini nygtady we Türkiýäniň Hamas-Ysraýyl ylalaşygynyň dowam etmegi we yzygiderli parahatçylygyň ýola goýulmagy üçin tagalla edýändigini aýtdy.

Anna güni Stambul şäherinde geçirlen 5-nji Türkiýe-Afrika işewürler we ykdysadyýet forumynda çykyş eden Erdogan “Ysraýyla ynanmaýarys, Gazanyň gaýtadan dikeldiş etaby gysga wagtda başlamaly”diýdi.

Erdogan, Türkiýäniň ylalaşygyň dowam etmegi we yzygiderli parahatçylygyň ýola goýulmagy üçin tagalla edýändigini belledi.

Sudanda akýan gan durmaly

Sudanda dowam edýän krizis hakynda hem durup geçen Erdogan, çaknyşyklara uly alada bildirýändigini, gysga wagtda ylalaşygyň gazanylmagyny we parahatçylygyň ýola goýulmagyny umyd edýändigini nygtady.

Halkara jemgyýetçiliniň Sudanda başdan geçirilýän soňky wakalar bilen gyzyklanmaýandygyny aýdan Erdogan “Akýan ganyň durmagy her bir adamyň adamkärçilik wezipesidir”diýdi.

Erdogan “Gynansakda Günbatarly ýurtlar, Afrikadaky içerki uruşlar, çaknyşyklar we düşnüşmezlikler bilen gyzyklanmaýar. Çaknyşyklary materiň ykbaly hökmünde görýär” diýip belledi.

2023-nji ýylyň aprel aýyndan bäri Sudanyň harby goşuny bilen RSF güýçleriniň arasynda dowam edýän çaknyşyklarda BMG-na we ýerli ýolbaşçylara görä 20 müňden gowrak adam ýogaldy, 15 million adam öýüni terk etdi.

ABŞ-nyň ýokary okuw jaýlarynyň geçiren barlaryna görä, çaknyşyklarda 130 müňe golaý adam ýogaldy.