ABŞ bilen Eýranyň wekilleri töwellaçylaryň gatnaşmagynda 28-nji fewraldan bäri dowam edýän söweşiň 45 gün möhlet bilen bes edilmegi meselesini ara alyp maslahatlaşdy.

48 sagadyň dowamynda ylalaşyk gazanmak ähtimallygynyň gaty pesdigine garamazdan bu tagalla dartgynlygyň öňüniň alynmagynyň ýeke-täk çykalgasy hökmünde görülýär.

ABŞ-nyň Prezidenti Donald Tramp Eýrana beren möhledini 20 sagat uzadandygyny we şol möhlediň sişenbe güni sagat 20.00-da dolýandygyny mälim etdi.

ABŞ-nyň möhüm gepleşikler geçirýändigini aýdan Tramp “Ylalaşyk gazanylmagyna garaşýaryn, eger şeýle bolman halatynda ol ýerde ähli zady ýok ederin” diýdi.

Iki tapgyrly teklip

Gepleşikleriň pakistanly, müsürli we türkiýeli töwellaçylar arkaly ABŞ-nyň ýörite wekili Stew Witkoff bilen Eýranyň Daşary işler ministri Abbas Arakçiniň aragatnaşyk saklamagy arkaly geçirilýändigi nygtaldy.

Teklip edilen iki tapgyrly ylalaşyk 45 gün möhlet bilen hüjümleriň bes edilmeginden soň söweşiň yzygiderli ýagdaýda bes edilmegini göz öňünde tutýar.

Töwellaçylar Ormuz bogazynyň gaýtadan açylmagynyň we Eýranyň kämilleşdirlen uran meselesiniň çözülmeginiň anyk ylalaşyk gazanylmagy bilen mümkin boljakdygyna ynanýar.

Eýranlylar Gazada we Liwanda bolşy ýaly ylalaşygyň diňe kagyz ýüzünde galmagyny islemeýär.

Töwellaçylar öňümizdäki 48 sagadyň uly ýykylşygyň öňüni almak üçin soňky pursatdygyny nygtaýar.