Eýranyň Daşary işler ministrligi, Ýewropa ýurtlarynyň sanksiýalaryň gaýtadan girizilmegi baradaky kararyndan soň ýadro gepleşikleriniň başlap bilmejekdigini mälim etdi.

Daşary işler ministrliginiň metbugat sekretary Ismail Bekaýi duşenbe güni beren beýannamasynda “Häzirki tapgyrda gepleşikler üçin hiç hili meýilnamamyz ýok” diýdi.

Bekaýi, E3 hökmünde bilinýän ýurtlar tarapyndan goýlan sanksiýalaryň gaýtadan güýje girmeginiň netijelerini seljerýändiklerini belledi.

Bekaýi “Elbetde diplomatiýa taýdan tagalla etmäge dowam ederis”diýip belledi.

Eýran bilen 2015-nji ýylda baglaşylan ýadro şertnamasyna gol goýan ýurtlar Britaniýa, Fransiýa we Germaniýa 28-nji sentýabrda sanksiýalaryň gaýtadan girizilendigini mälim edipdi.

ABŞ-nyň we Ysraýylyň başda durmagynda Günbatarly ýurtlar, Eýranyň ýadro ýaragyna öndürmek isleýändigini öňe sürýär we uranyň kämilleşdirilmegini gyzyl çyzyk hökmünde häsiýetlendirýär.

Eýran bolsa günäkärlemeleri kabul etmeýär we ýadro meýilnamasynyň parahatçylykly maksatlydygyny nygtaýar.

Eýran Ýadro ýaraglarynyň ýaýramagynyň öňüni alyş şertnamasynyň çäginde urany kämilleşdirmek hukugynyň bardygyny nygtaýar.

Halkara Atom energiýasy gullugyna görä, Eýran ýadro meýilnamasy bolmadyk ýurtlaryň arasyndaky urany 60 göterime çenli kämilleşdiren ýeke-täk ýurt we şol dereje bomba öndürmek üçin zerur bolan 90 göterimlik mukdara has ýakyn.

2015-nji ýylda ABŞ, Britaniýa, Fransiýa we Germaniýa, Russiýa we Hytaý Eýran bilen ýadro şertnamasyny baglaşypdy.

Ýadro şertnamasy Eýranyň ýadro meýilnamasyndan ýüz öwürmegini we Günbatarly ýurtlar tarapyndan Eýrana goýlan sanksiýalaryň bes edilmegini öz içine alýardy.

ABŞ-nyň Prezidenti Donald Tramp, 2018-nji ýylda prezidentliginiň birinji döwründe şertnamadan çekilipdi we Eýrana garşy sanksiýa goýulmagy dogrusynda karar kabul edipdi.