Prezident Erdogan “Ýüpek ýolunyň döwrümizdäki ady bolan Hazardan geçýän Gündogar-Günbatar Merkezi koridorynyň ähmiýeti gün saýyn artýar. Biz Gazagystan we beýleki ýaranlarymyz bilen birlikde bu koridory diňe haryt gatnatmak üçin däl eýsem energiýa serişdeleriniň günbatarly ýurtlara ýetirilmegi üçin hem ulanylmagyny höweslendirmäge dowam ederis” diýdi.
Prezident Erdogan Astanada Garaşsyzlyk köşgünde Gazagystanyň Prezidenti Prezidenti Kasym-Žomart Tokaýew bilen duşuşdy. Erdogan bilen Tokaýew özara duşuşykdan soň Türkiýe-Gazagystan Ýokary derejeli hyzmatdaşlyk geňeşiniň altynjy maslahatyna ýolbaşçyk etdi.
Iki lider soň bolsa metbugata beýannama berdi.
Prezident Erdogan bilelikdäki metbugat ýygnagynda “Türkiýe-Gazagystan Ýokary derejeli hyzmatdaşlyk geňeşiniň altynjy maslahatyny üstünlikli ýagdaýda geçirdik. Birnäçe şertnama gol çekişdik. Jenap Tokaýew bilen wekiliýeti bilen geçiren gepleşiklerimizde söwda, aragatnaşyk, energiýa, saglygy goraýyş, medeniýet, bilim, tehnalogiýa we goranyş senagaty ýaly birnäçe ugur boýunça edýän hyzmatdaşlygymyzy giňişleýin ara alyp maslahatlaşdyk. Özara hyzmatdaşlygymyzy we Gazagystandaky maýa goýumlarymyzy artdyrmak üçin degişli guramalary höweslendirmäge dowam ederis” diýdi.
Prezident R. T. Erdogan “Türk dünýäsiniň umumy medeni gymmatlyklaryny, tanymal şahsyýetleriniň garaýyşlaryny, eserlerini we ruhy mirasyny geljek nesillere ýetirmegi esasy jogapkärçiligimiz hökmünde görýäris. Jenap Tokaýewiň goldaw bermeginde Türkiýe Magarif gaznasynyň Astana we Almaty şäherinde ýörite mekdebiniň açylmagy üçin işe girişildi. Bu meselä goldaw beren Jenap Prezidente minnetdarlyk bildirýärin” diýdi.
Gazagystanyň berýän maddy we ruhy goldawlaryna kanagatlanma bildiren Erdogan, “6-njy fewralda bolan ýer titremesinden soň Gazagystanyň beren goldawlaryny asla ýatdan çykarmarys. Şol agyr günlerimizde gazak doganlarymyzyň we Gazagystan döwletiniň maddy we ruhy goldawy biziň üçin diýseň möhümdi. Şu gün Gazagystanyň Türkiýäniň Gaziantep şäheriniň Nurdagy etrabynda guran başlangyç klas mekdebiniň dabaraly ýagdaýda açylmagy biziň üçin uly bagtyýarlyk. Türkistanyň Piri Hoja Ahmet Ýasawynyň adyny göterýän bu mekdepde bilim aljak çagalarymyzyň dostlugymyzy geljek nesillere ýetirjekdigine doly ynanýaryn” diýdi.
Gazagystanyň Prezidenti Tokaýewe özüne “Hoja Ahmet Ýasawy” nyşanynyň berlendigi üçin sagbolsun aýdan Erdogan, nyşanyň iki ýurduň arasyndaky doganlyk gatnaşyklarynyň simwoly bolandygyny nygtady.
