Russiýanyň Prezidenti Wladimir Putin Moskwanyň Eýran bilen birlikde ähli ýurtlaryň köpçülikleýin gyrgyş ýaragyna eýe bolmagyna garşydygyny ýene-de bir gezek nygtady.
Putin SkyNýus Arabia beren beýannamasynda, Russiýanyň parahatçylykly maksatly ýadro energiýasyny ösdürmek hukugyna goldaw berýändiklerini nygtady we Halkara Atom energiýasy gullugynyň Tähranyň ýadro ýaragyna eýe bolmak isleýändigi barada hiç hili subutnama tapyp bilmändigini belledi.
“Eýranda ýadro ýaraglaryny gadagan edýän fetwa diýseň möhüm” diýen Putin, bu dini kararyň Eýranyň pozisiýasynda möhüm elementdigini nygtady.
Parahatçylykly maksatly ýadro energiýasyna eýe bolmak
Putin, Russiýanyň Eýranyň parahatçylykly maksatly ýadro energiýasyna eýe bolmak meýilnamasyna goldaw berýändigini we bu mesele boýunça kömek bermäge taýardyklaryny aýtdy.
13-nji iýunda Ysraýylyň Eýrandaky harby merkezler we ýadro desgalary bilen birlikde birnäçe ýere howa hüjümini guramagy bilen başlan çaknyşyklar, Tähranyň degişli gaýtawuly görkezmegi sebäpli dowam edýär.
Ysraýylyň berýän maglumatyna görä, şol günden bäri Eýranyň guraýan raketa hüjümlerinde azyndan 25 adam ýogaldy, ýüzlerçe adam ýaralandy.
Eýranyň köpçülikleýin habar beriş serişdeleri Ysraýylyň hüjümleri sebäpli häzire çenli 639 adamyň ýogalandygyny, 1300-den gowrak adamyň hem ýaralanandygyny aýan etdi.
