USS Gerald R. Ford uçar gämisi ABŞ-nyň Prezidenti Donald Trampyň tabşyrygy boýunça ABŞ-nyň Ýakyn Gündogardaky harby güýçleriniň hataryna goşulmak üçin anna güni Ortaýer deňzine girdi.
Uçar gämisiniň Atlantik okeanyny Ortaýer deňzi bilen birleşdirýän Gibraltar bogazyndan geçendigi habar berildi.
Ýakyn Gündogara harby güýç ornaşdyrmaga dowam edýän Donald Tramp, anna güni beren beýannamasynda, Tähran bilen täze ylalaşyk gazanylman halatynda Eýrana çäkli zarba urmak meselesini gün tertibine alandygyny mälim edipdi.
ABŞ-nyň Ýakyn Gündogardaky harby güýji
Gämiler
Amerikaly resmilere esaslanylýan habara görä, Waşingtonyň häzirki wagtda Ýakyn Gündogarda 13 harby gämisi bar.
USS Abraham Linkoln uçar gämisi dokuz destroýer we üç harby gämi bilen birlikde sebite bardy.
Dünýäniň iň uly uçar gämisi bolan USS Gerald R. Ford bolsa üç destoýer bilen birlikde sebite tarap barýar.
Şeýlelikde ABŞ-nyň sebitdäki harby gämileriniň sany 17-ä ýeter. Uçar gämileriniň her birinde müňlerçe deňizçi iş alyp barýar we onlarça harby uçardan ybarat howa topary bar.
Şeýle uly iki uçar gämisiniň şol bir wagtda Ýakyn Gündogarda bolmagy seýrek gabat gelýän wakalardan biri.
Howa güýçleri
Uçuş yzarlama saýty Flightradar 24-iň we habar beriş serişdeleriniň habarnamasyna görä, ABŞ sebite uçar gämilerinden daşary onlarça harby uçar ugratdy.
Şol uçarlaryň arasynda F-22 Raptor we F-35 harby uçarlary bilen birlikde, F-15 we F-16 uçarlary bilen operasiýalaryň dowam etdirilmegi üçin zerur bolan howada ýangyç doldurýan KJ-35 uçary hem bar.
Howa goranyş ulgamlary
Habarnamalara görä, ABŞ Ýakyn Gündogara howa goranyş ulgamlaryny hem ornaşdyrdy. Sebitde ugradylan köp sanly raketa ulgamy deňizde howa goragyny üpjün eder.
ABŞ-nyň howa güýçleriniň Eýrana garşy hüjüm guramagyna garaşylmaýan bolsada ABŞ-nyň Ýakyn Gündogardaky harby merkezlerinde onmüňlerçe harby hünärmeni bar.
