ABŞ-nyň Prezidenti Donald Tramp, Türkiýä F-35 harby uçarlarynyň satylmagy meselesine çynlakaý çemeleşýändigini aýtdy.

Tramp duşenbe güni metbugata beren beýannamasynda žurnalistleriň ABŞ-nyň Türkiýä F-35 harby uçarlaryny satyp satmajakdygy hakyndaky soragyna “Meselä çynlakaý çemeleşýäris” diýip jogap berdi.

Ysraýylyň garşylygyna garamazdan Trampyň meselä ünsli çemeleşýändigi hakyndaky beýannamasy ünsleri özüne çekdi.

ABŞ-nyň Türkiýedäki Adatdan daşary we Doly ygtyýarlygy ilçisi we Siriýa boýunça ýörite wekili Tom Barrak üstümizdäki aýyň başynda Waşingtonyň Ankara bilen F-35 harby uçarlary meselesinde gepleşik geçirýändigini we ýakynda öňe gidişligiň edilmegini umyd edýändigini aýdypdy.

Tom Barrak, Prezident Tramp bilen Türkiýe Respublikasynyň Prezidenti R. T. Erdoganyň arasyndaky gatnaşygyň täze hyzmatdaşlyk mümkinçiligini döredendigini we F-35 meselesinde soňky 10 ýyllygyň iň netijeli gepleşikleriniň geçirlendigini aýtdy.

ABŞ Türkiýäniň Russiýadan S-400 howa goranyş ulgamlaryny satyn alandygy sebäpli 2019-njy ýylda Türkiýäni F-35 harby uçar meýilnamasyndan çykarypdy.

Türkiýe meýilnamadan çetleşdirilmegine garşylyk görkezipdi we Trampyň ikinji prezidentlik döwründe meseläniň çözüljekdigine ynanýandygyny mälim edipdi.

Türkiýäniň Daşary işler ministri Hakan Fidan hem üstümizdäki aýyň başynda Ankaranyň JAATSA sanksiýalary meselesinde Waşington bilen başdan geçirilýän düşnüşmezligiň ortadan aýryljakdygyna ynanýandygyny aýdypdy.