Owganystanyň demirgazygynda bolan 6,3 bal ululygyndaky ýer titremesde azyndan 20 adamyň ýogalandygy we takmynan 1000 adamyň ýaralanandygy habar berildi. Sişenbe güni zyýan çeken ýerlerde harabalyklary aýyrmak işleri başlandy.
Ýer titreme duşenbe güni irden ýurduň demirgazygyndaky Mazari-Şerif şäheriniň golaýynda boldy. Resmiler azyndan 20 adamyň ýogalandygyny we şäheriň taryhy Mawy metjidine zyýan ýetirilendigini habar berdiler.
Birleşen Milletler Guramasynyň Owganystandaky ynsanperwer işleri utgaşdyrmak boýunça edarasynyň soňky maglumatlaryna görä, takmynan 945 adam ýaralandy.
Owganystanyň Milli betbagtçylyklary dolandyrmak edarasynyň maglumatlaryna görä, ýüzlerçe öý doly ýa-da bölekleýin weýran boldy. Ynsanperwer kömek agentlikleri ýurtda gyş golaýlaşyp, temperaturanyň nol gradusyň aşagynda galmagy bilen ýagdaýyň howsala döredýändigini aýtdylar.
Sişenbe güni ýer titremesiniň merkezine golaý bolan Tangi Taşkurgan sebitiniň ýaşaýjylary harabalyklary arassalamaga we zeper ýeten jaýlary berkitmäge başladylar.
