Erdogan Täze ýyl gijesi esgerlere beren ýüzlenmesinde Türkiyäniň harby üstünliklerini öwdi

Prezident Rejep Taýýip Erdogan çarşenbe güni eden çykyşynda Ankaranyň sebit we global durnuklylygy üpjün etmek üçin goranyş pudagynda özgerişlikli ädimler edýändigini; bu ädimleriň Türkiye Respublikasynyň esaslandyryjysy Mustafa Kemal Atatürküň "Ýurtda parahatçylyk, dünýäde parahatçylyk" diýen daşary syýasat ýörelgesine laýyk gelýändigini aýtdy.

Erdogan içerki jebisligi berkitmek üçin edilýän tagallalary we hususan-da goranmak senagatyndaky “oýun üýtgediji” ösüşleri nygtap geçip: “Sebitimizde we ondan daşarda durnuklylygy üpjün etmek üçin tutanýerli göreş alyp barýarys” diýip habar berdi.

Täze ýyl gijesinde ol paýtagt Ankaranyň Polatly etrabyndaky Artilleriýa we Raketa Mekdebiniň serkerdeligindäki harby gullukçylara jaň edip, ýüzlenmeler berdi.

Erdogan Türkiyäniň “Altaý” tanklary, “Fyrtyna” gaubitsalary, ATAK dikuçarlary, ýaragly we ýaragsyz uçarmansyz howa ulaglary, uzak aralykly raketalar, howa goranyş ulgamlary, harby gämiler, suwasty gämiler we sürüjisiz deňiz ulaglary ýaly giňelýän harby mümkinçilikleriniň ýerli önümçilik arkaly ösdürilýändigini mälim etdi.

“Goranyşyň ähli ugurlarynda uly öňegidişligi başdan geçirýäris” diýip, Erdogan ýurduň öz serişdelerini ulanyp, öz-özüni üpjün edýän harby infrastruktura gurýandyklaryny beýan etdi.

Erdogan "çynlakaý kynçylyklara we päsgelçiliklere" garamazdan, Türkiyäniň soňky gazananlaryny dowamly üstünliklere öwürmek üçin "taryhy mümkinçiligi" ulanandygyny aýtdy.

Prezident Erdogan hökümetiň ýurdy has-da güýçlendirmek we geljekki nesillere "täze, güýçli we beýik Türkiye" gowşurmak baradaky ygrarlylygyny beýan etdi.