Russiýanyň döwlet habarlar agentligi TASS tarapyndan çap edilen beýanata görä, Russiýanyň prezidenti Wladimir Putin Hytaýa gurajak saparyndan ozal Moskwa bilen Pekiniň arasyndaky gatnaşyklaryň "öň görlüp-eşidilmedik derejä" ýetendigini aýtdy we iki ýurduň arasyndaky dostlugyň "hiç kime gönükdirilen däldigini" nygtady.
Sişenbe güni Pekine gurajak saparyndan öň görkezilen wideo çykyşynda Putin, Russiýa bilen Hytaýyň syýasy, ykdysady, goranmak we ynsanperwer ugurlarda hyzmatdaşlygy giňeltmäge berk ygrarlydygyny aýtdy.
Putin: “Biziň dostlugymyz hiç kime garşy gönükdirilen däl” diýip, iki ýurduň arasyndaky gatnaşyklaryň “özara düşünişmäge we ynama” esaslanýandygyny we birek-biregiň esasy bähbitlerini, şol sanda özygtyýarlylygy we döwlet birligini goldamaga esaslanýandygyny beýan etdi.
Putin Pekine Hytaýyň prezidenti Si Szinpiniň çakylygy bilen barýandygyny, Si Szinpini "köp ýyllyk gowy dost" hökmünde häsýetlendirdi we ýokary derejeli yzygiderli gatnaşyklaryň ikitaraplaýyn gatnaşyklary çuňlaşdyrmak üçin örän möhümdigini belledi.
Rus lideri iki ýurduň 25 ýyl mundan ozal Goňşuçylyk we dostlukly hyzmatdaşlyk hakyndaky şertnama gol çekilenden bäri "hakykatdanam strategik gatnaşyklary we hemmetaraplaýyn hyzmatdaşlygy" ýola goýandygyny aýtdy.
Putin: "Gatnaşyklaryň aýratyn häsiýeti özara düşünişmek we ynam atmosferasynda, özara peýdaly we adalatly hyzmatdaşlygy saklamaga ygrarlylykda, hormat esasyndaky gepleşikleri alyp barmakda we iki ýurduň esasy gyzyklanmasy bolan meselelerde, şol sanda özygtyýarlylygy we döwlet bitewiligini gorap saklamakda birek-biregi goldamakda öz beýanyny tapýar" diýip aýtdy.
Putin şeýle hem ykdysady hyzmatdaşlygy öwüp, ikitaraplaýyn söwdanyň 200 milliard dollardan geçendigini we söwdalaryň häzir "dolylygyna diýen ýaly rubl we ýuan bilen" amala aşyrylýandygyny aýtdy.
Putin özara wizasyz režimiň girizilmegini gutlaýandygyny we bu hereketiň syýahatçylygy, işewür syýahatlary we halklaryň arasyndaky gatnaşygy ösdürjekdigini aýtdy.
Putin Moskwanyň Hytaýyň taryhyna we medeniýetine ýokary baha berýändigini we iki ýurduň arasyndaky ynsanperwer we medeni gatnaşyklary çuňlaşdyrmagy maksat edinýändigini beýan etdi.
