Donald Tramp Ysraýyl we Hamas tarapyndan birnäçe hepde ozal teklip edilen Gaza ylalaşygynyň birinji tapgyryny kabul edendigini we ysraýylly zamun alynanlaryň hemmesiniň şol ylalaşyga laýyklykda boşadyljakdygyny aýtdy.
Tramp çarşenbe güni "Truth Social" gollanmasyndan beren beýanatynda: "Ysraýyl bilen Hamasyň Parahatçylyk meýilnamamyzyň birinji tapgyryny kabul edendiklerini buýsanç bilen yglan edýärin" diýdi.
ABŞ-nyň Prezidenti: "Bu, zamun alnanlaryň ählisiniň ýakyn wagtda boşadyljakdygyny we Ysraýylyň güýçli, dowamly we ebedi parahatçylyga tarap ilkinji ädim hökmünde ylalaşylan liniýa yza çekiljekdigini aňladýar” diýdi.
Tramp ähli taraplara “adalatly ýagdaýda” çemeleşiljekdigini belläp, bu pursaty arap we musulman dünýäsi, Ysraýyl, golaýdaky ýurtlar we ABŞ üçin “uly bir gün” hökmünde häsýetlendirdi.
Hamas tassyklady
Bu beýannamadan soň Hamas ylalaşygy kabul edendigini mälim etdi we Katara, Müsüre we Türkiyä eden tagallalary üçin minnetdarlyk bildirdi.
Hamas Telegramdan beren beýanatynda: "Hamas Gazadaky söweşiň bes edilmegini, basybalyjylary yza çekilmegini, ynsanperwer kömegini we tussaglaryň alyş-çalşygyny göz öňünde tutýan ylalaşygyň gazanylandygyny habar berýär" diýdi.
Beýanatda: "Katar, Müsür we Türkiyedäki araçy doganlarymyzyň eden tagallalary üçin minnetdarlyk bildirýäris. Şeýle hem ABŞ-nyň prezidenti Donald Trampyň urşy dolulygyna bes etmek we basyp alyjy Ysraýylyň harby güýçleriniň Gaza zolagyndan doly çykarylmagy baradaky tagallalaryna ýokary baha berýäris" diýdi.
Netanýahu “ahlak taýdan ýeňiş” yglan etdi
Netanýahu, hökümetiň ylalaşygy tassyklamak we tussaglary yzyna gaýtarmak üçin ertir ýygnanyşjakdygyny aýtdy.
Netanýahu Trampyň ylalaşygy yglan etmeginden soň: "Bu Ysraýyl üçin ajaýyp gün. Bu ylalaşyk diplomatik üstünlik we Ysraýyl üçin ahlak taýdan ýeňiş" diýdi.
Gazadaky harby operasiýalaryň bu "öwrülşik nokada" ýetmek üçin möhümdigini aýtdy.
Iki ýyl dowam eden genosidden soň şertnama
Tramp beýanatyny Ysraýylyň Gaza garşy başladan genosidiniň ikinji ýylyndan bir gün soň berdi.
Soňky iki ýylda Ysraýyl aglabasy çagalardan we zenanlardan ybarat bolan 67100-den gowrak palestinalyny öldürdi. Hünärmenler bu görkezijiniň has köpdügini aýdýarlar.
Ysraýyl gabaw astyndaky ýerleriň köp bölegini weýran etdi we tutuş ilaty diýen ýaly göçürdi.
