Müsür Rafah gümrük geçelgesi açylan halatynda Gazadan ýaralananlary kabul etmäge we sebite ynsanperwer kömegini ýetirmäge taýardygyny mälim etdi.
Demirgazyk Sina welaýatynyň häkimi Khaled Mužawir çarşenbe güni Müsüriň teleýaýlymyna beren beýannamasynda, Rafah gümrük geçelgesiniň Müsür tarapyndan degişli taýarlyklaryň görülýändigini aýtdy.
Degişli taýarlyklaryň görülýändigini aýdan Mužawir, Kairdäki krizis merkezi bilen döwlet eýeçiligindäki edaradyr-kärhanalaryň utgaşykly ýagdaýda işleşýändigini, sebite ynsanperwer kömeginiň ýetirilmegi we Gazadan ýaralanananlaryň kabul edilmegi üçin taýardyklaryny belledi.
Ysraýylyň KAN teleýaýlymyna görä, Rafah gümrük geçelgesiniň iki taraply ýagdaýda 1-nji fewralda açylmagyna garaşylýar.
Ylalaşygyň birinji tapgyrynyň şertleriniň ýerine ýetirilmegi
ABŞ-nyň Prezidenti Donald Tramp 2025-nji ýylyň 9-njy oktýabrynda Müsür bilen geçirlen gepleşikleriň çäginde beren beýannamasynda, Ysraýyl bilen Hamasyň Gaza üçin ylalaşyk meýilnamasynyň birinji tapgyryny tassyklandygyny mälim edipdi.
Ysraýylyň hökümeti tarapyndan tassyklanan ylalaşyk bir gün soň güýje girdi.
Gazadaky soňky ysraýylly ýesir Ran Gwiliň jesediniň 26-njy ýanwarda Ysraýyla yzyna berilmegi bilen Gazadaky Palestinli toparlar ylalaşygyň birinji tapgyrynyň şertlerini umuman alnanda ýerine ýetirdi.
Ylalaşyga garamazdan Ysraýylyň harby goşuny dürli bahanalar bilen Gazadaky palestinlilere garşy guraýan hüjümlerini dowam etdirýär.
Beýleki tarapdan ABŞ-nyň Prezidenti Donald Trampyň Ýakyn Gündogar boýunça ýörite wekili Stiw Witkoff, 14-nji ýanwarda 20 maddalyk Gaza meýilnamasynyň ikinji tapgyrynyň başlandygyny mälim etdi.
Ylalaşygyň birinji tapgyryna laýyklykda Ysraýylyň 2024-nji ýylyň maý aýyndan bäri ýapyk bolan Müsür-Gaza serhedindäki Rafah gümrük geçelgesini açmagyna we ynsanperwer kömeginiň Gaza ýetirilmegine rugsat bermegine garaşylýar.
