Sişenbe güni “Wall Street Journal” gazetinde çap edilen habara görä, ABŞ-nyň prezidenti Donald Tramp öz kömekçilerine Eýrana garşy giňeldilen blokada üçin taýýarlyk görmek barada tabşyryk berdi.

ABŞ-nyň resmilerine salgylanyp berlen habarda Trampyň soňky duşuşyklarda gämi gatnawyny blokirlemek arkaly Eýranyň ykdysadyýetini we nebit eksportyny çäklendirmegi dowam etdirmegi makul görendigi aýdylýar.

Habara görä, resmiler Trampyň beýleki ýollary, ýagny bombalamaga dowam etmegiň ýa-da çaknyşykdan çekilmegiň blokadany saklamakdan has howply hasaplaýandygyny aýtdylar.

ABŞ we Ysraýyl 28-nji fewralda Eýrana garşy bilelikdäki operasiýa başladylar, Tähran bolsa ABŞ-nyň sebitdäki, esasan Pars aýlagy ýurtlaryndaky bähbitlerine hüjümler bilen jogap berdi.

Pakistanyň araçylyk etmegi bilen 8-nji aprelde ot açmagy bes etmek barada ýaraşyk yglan edildi; 11-12-nji aprelde Yslamabadda gepleşikler geçirilen hem bolsa, gepleşikler ylalaşyk bilen netijelenmändi.

Tramp soňra Pakistanyň haýyşy boýunça ot açmagy bes etmegiň Tährandan teklip gelýänçä çenli uzaldylandygyny aýtdy.

Tramp duşenbe güni beren beýanatynda Tähranyň onuň soňky teklibini kabul etmeginiň mümkin däldigini görkezdi, bu teklip "Ormuz bogazyny gaýtadan açmagy we ýadro maksatnamasy baradaky soraglary soňraky gepleşikler üçin galdyrmagy" göz öňünde tutýar.