Owgan hökümetiniň metbugat sekretarynyň beren beýannamasyna görä, Pakistanyň harby goşuny paýtagt Kabul bilen birlikde Kandahar we Paktika welaýatynyň başda durmagynda Owganystanyň çar tarapyna howa hüjümini gurady.

Mesele hakynda berlen beýannamada, Pakistanyň harby goşunynyň käbir sebitlere howa hüjümini gurandygy, ýerli wagt bilen 02.30 töweregi Kabulyň şäher merkezinden partlama sesleriniň eşidilendigi nygtaldy.

Owgan hökümetiniň metbugat sekretary hüjümlerde adam pidasynyň çekilmändigini mälim etdi.

Pakistan bolsa hüjümler sebäpli Owganystanyň uly ýitgi çekendigini habar berdi.

Pakistanyň Premýer-ministriniň metbugat sekretary Mosharraf Zaidi hüjümlerde 133 owgan esgeriniň öldürlendigini, 200-den gowrak esgeriň hem ýaralanandygyny aýtdy.

Zaidi hüjümlerde Pakistanyň harby goşunynyň Owganystana degişli 27 harby merkezi we 80-den gowrak tank bilen sowutly ulagy hatardan çykarandygyny mälim etdi.

Owganystanyň Kandahar welaýatyna guralan hüjümde ýarag ammary bilen logistiki harby bazanyň hatardan çykarlandygy nygtaldy.

Beýleki tarapdan Owganystanyň Goranmak ministrligi, owgan güýçleriniň Durand liniýasynda Pakistanyň pozisiýalaryny nyşana alan operasiýalaryny düýn gije tamamlandygyny mälim etdi.

4 sagat dowam eden çaknyşykda azyndan 8 owgan esgeri bilen pakistanly 2 esgeriň ýogalandygy nygtaldy.

Pakistanyň geçen hepde 70 terrorçyny öldürendigini mälim etmeginden soň iki goňşy ýurduň arasyndaky dartgynlyk möwjedi.

BMG-nyň Baş sekretary Antoniu Guterreş, çaknyşyklara alada bildirýändigini mälim etdi.

BMG-nyň Baş sekretarynyň metbugat geňeşçisi Stefan Dužarriç, Guterreşiň degişli taraplara halkara hukugynyň çäginde jogapkärçilikli hereket etmekleri we dartgynlygyň diplomatiýa arkaly çözülmegi üçin çagyryş edendigini aýan etdi.