Türkiýe Respublikasynyň Prezidenti Rejep Taýyp Erdogan resmi sapar bilen Ankara gelen Liwan Respublikasynyň Prezidenti Jozef Oun bilen Prezidentiň köşgünde duşuşdy. Iki döwletiň Baştutanlarynyň özara duşuşygyndan soň bilelikdäki metbugat ýgnagy geçirildi.
Metbugat ýygnagynda çykyş eden Prezident Erdogan Liwanyň uzak ýyllaryň dowamynda sebitdäki käbir güýçleriň bäsdeşliginiň we çaknyşyklarynyň esasy pidalarynyň birine öwrülen doganlyk döwletdigini beýan etdi. Şeýle hem ol Ýakyn Gündogarda durnuklylygy, parahatçylygy we özara bähbitli hyzmatdaşlygy üpjün etmäge gönükdirilen tagallalardan iň köp peýda görjek ýurtlaryň hatarynda Liwanyň möhüm orun eýeleýändigini aýtdy.
Prezident Erdogan 2026-njy ýylyň 2-nji martyndan bäri Ysraýylyň Liwana garşy amala aşyrýan hüjümleriniň netijesinde 4 müň 300-den gowrak liwanlynyň heläk bolandygyny, 2 müňden gowrak adamyň şikes alandygyny we 1 milliona golaý adamyň öýlerini terk etmäge mejbur bolandygyny aýtdy.
Prezident Erdogan çykyşynda şeýle diýdi:
«Hormatly Prezidentiň şahsynda doganlyk Liwan halkyna çuňňur gynanç bildirýärin, ýaralananlara şypa edileýärin. Türkiýe ilkinji günden bäri bu hüjümlere garşy iň berk reaksiýa bildiren döwletleriň biri boldy. Ysraýylyň adamzada garşy edýän jenaýatlaryny halkara gün tertibinde yzygiderli gozgadyk. Hüjümleriň we basybalyjylygyň bes edilmegine gönükdirilen diplomatik tagallalar bilen ýakyndan gyzyklanýarys. Hüjümlerde agyr zyýan çeken Günorta Liwanyň gaýtadan dikeldilmegine ýurdumyz tarapyndan ähli zerur goldawy berilmäge taýýar.»
Liwan Respublikasynyň Prezidenti Jozef Oun bolsa iki ýurduň arasynda taryhy taýdan berk binýatly dostlukly gatnaşyklaryň bardygyny nygtady.
Ol çykyşynda: «Iki halkyň bähbidine we sebitiň durnukly ösüşine hyzmat etjek hyzmatdaşlygy has-da güýçlendirmek ugrunda güýçli syýasy erk-islegimiz bar» diýip, belledi.
Prezident Jozef Oun myhmansöýerlik we mähirli kabul edendigi üçin Prezident Rejep Taýyp Erdogana hoşallyk bildirip, bu saparyň sebit üçin örän möhüm günlerde amala aşandygyny aýtdy. Onuň bellemegine görä, häzirki wagtda Ýakyn Gündogar geljekki ösüşiň we täze syýasy gurluşyň kemala gelýän giňişligine öwrülýär.
Ol Türkiýe bilen Liwanyň doganlyk gatnaşyklarynyň geljekde has-da pugtalandyryljakdygyny nygtap, Prezident Erdoganyň öňdengörüjilikli syýasaty we berk syýasy erk-islegi netijesinde bu gatnaşyklaryň täze derejä çykaryljakdygyna ynam bildirdi.
Prezident Jozef Oun Türkiýe Respublikasynyň esaslandyryjysy Gahryman Mustafa Kemal Atatürküň «Ýurtda parahatçylyk, dünýäde parahatçylyk» diýen parasatly sözlerine salgylanyp, iki ýurduň dostlukly gatnaşyklarynyň taryhy mirasa mynasyp derejede mundan beýläk-de ösdüriljekdigini aýtdy hem-de çykyşyny «Liwan–Türkiýe dostlugy baky ýaşasyn!» diýen sözler bilen jemledi.
