Fidan: ABŞ Waşingtondaky gepleşiklerden soň Siriýanyň birleşmegine bolan zerurlygyna düşündi
Türkiye Respublikasynyň Daşary işler ministri ABŞ-ly kärdeşi Marko Rubio we Ak Tamyň ýokary derejeli resmileri bilen Siriýa, sebitleýin howpsuzlyk we Sezar kanuny barada pikir alyşdy.
Türkiyäniň Daşary işler ministri Waşingtona guran saparynyň dowamynda ABŞ-nyň resmileri we siriýaly kärdeşi bilen aýratyn duşuşyklar geçirendigini, duşuşyklarda Siriýadaky we Gazadaky wakalaryň ara alnyp maslahatlaşylandygyny we ABŞ-nyň Siriýanyň jebisligini gorap saklamagyň zerurdygyna düşünendigini aýtdy.
Duşuşyklardan soň ABŞ-daky türk metbugatyna beyanat beren Daşary işler ministri Hakan Fidan duşenbe güni ABŞ-nyň prezidenti Donald Tramp bilen Siriýanyň prezidenti Ahmed Şaranyň arasyndaky duşuşygyň bir bölegine çagyrylandygyny we ABŞ-nyň Döwlet sekretary Marko Rubio, wise-prezident J.D. Wans, şeýle hem ABŞ-nyň ýörite wekilleri Stiw Witkoff we Tom Barak bilen duşuşyklar geçirendigini aýtdy.
Fidan gepleşikleriň dowamynda Ankaranyň Siriýa baradaky garaýyşlaryny beýan edendigini aýtdy.
ABŞ-nyň paýtagtynda türk metbugatyna beýanat beren Fidan: "Esasan hem Siriýanyň günortasynda, demirgazygynda, şeýle hem beýleki sebitlerdäki meseleli sebitleriň nähili has gowy dolandyrylyp bilinjekdigini we Sezar kanuny bilen baglanyşykly işleriň nähili alnyp barlyp bilinjekdigini jikme-jik öwrenmäge mümkinçilik tapdyk. Şeýle hem Türkiyäniň Siriýa baradaky umumy garaýyşlaryny, ABŞ bilen hyzmatdaşlyk mümkinçiliklerini we Siriýanyň ösüşi, agzybirligi, raýdaşlygy, parahatçylygy we sebitleýin howpsuzlygy bilen baglanyşykly başga-da köp meseleleri ara alyp maslahatlaşmaga mümkinçilik tapdyk" diýip habar berdi.
Şaraanyň sapary, ýurduň 80 ýyl mundan ozal garaşsyzlygyna eýe bolmagyndan bäri, Siriýanyň lideriniň Ak Tama ilkinji sapary boldy.
Fidan gepleşiklere Siriýanyň Daşary işler ministri Asad al-Şabani, Rubio, Witkoff we Barak, şeýle hem ABŞ-nyň wise-prezidenti J.D. Wansyň gatnaşandygyny mälim etdi.
Palestina, Ukraina, Eýran
Hakan Fidan soňra bolsa Witkoff we Barak bilen aýratynlykda duşuşyklar geçirendigini we köp meseleleri, esasanam Palestina meselesini "jikme-jik gözden geçirendiklerini" aýtdy.
Fidan, dowam edýän Russiýa-Ukraina urşunyň hem gün tertibindedigini belläp: "Biz bu barada hem uzak wagtlap pikir alyşdyk. Başgaça aýdylanda, bu urşy bes etmek üçin şu möhüm pursatda nämeleriň edilip bilinjekdigini, Türkiyäniň nähili roly bolup biljekdigini we ABŞ bilen nähili işleşip biljekdigimizi ara alyp maslahatlaşdyk. Prezidentimiziň bu mesele boýunça käbir garaýyşlary bar" diýip nygtady.
Fidan şeýle hem Eýranyň ýadro gepleşikleri boýunça ABŞ-nyň pozisiýasy barada "giň gerimli" pikir alyşmalarynyň bolandygyny we soňra gepleşikleriň netijeleri barada Prezident Erdogana maglumat berendigini aýtdy.