Köpçülikleýin habar beriş serişdeleriniň berýän habaryna görä, Eýranyň uçarmansyz howa ulaglary Saud Arabystanynyň Ras Tanura nebiti gaýtadan işleýän desgasyny nyşana aldy. Hüjüm desgada ýangyna sebäp boldy.
Saud Arabystany bolsa uçarmansyz howa ulaglarynyň yzyna serpikdirlendigini mälim etdi.
Resmi habarlar gullugy SPA, Goranmak ministrligine esaslanýan habarynda “Şu gün irden Ras Tanura nebiti gaýtadan işleýän desga uçarmansyz howa ulagy bilen hüjüm guralmaga synanşyldy. Howa goranyş ulgamlarymyz hüjümiň öňüni aldy we uçarmansyz howa ulaglaryny hatardan çykardy. Şrapnel bölejikleri sebäpli desgada ýangyn boldy, emma adam pidasy çekilmedi” diýdi.
“Roýter” habarlar gullugy, Saud Arabystanynyň iň uly nebit kärhanasy Aramkonyň, uçarmansyz howa ulagy bilen guralan hüjümden soň Ras Tanura desgasyny ýapandygyny mälim etdi.
Habarda desganyň wagtlaýyn howpsuzlyk maksatly ýapylandygy nygtaldy.
Saud Arabystanynyň gündogar kenarynda ýerleşýän Ras Tanura, ýurduň nebiti gaýtadan işleýän iň uly desgasy we eksport merkezlerinden biri.
Günde 550 müň barrel mümkinçiligine eýe bolan desga Ýakyn Gündogaryň iň uly nebiti gaýtadan işleýän desgalaryndan biri.
Saud Arabystanynyň nebit desgalarynyň goralmagy üçin berk howpsuzlyk çärelerini görendigine garamazdan desgalar ozal nyşana alnypdy.
2019-njy ýylyň sentýabr aýynda Abkaýk we Hureýs desgalaryna guralan raketa we dron hüjümleri Saud Arabystanynyň çig nebit önümçiligini bökdäpdi we halkara nebit bazaryna ýaramaz täsirini ýetiripdi.
ABŞ bilen Ysraýyl şenbe güni Eýrana garşy hüjüm başladypdy we hüjümlerde dini lider Ali Hamaneý bilen birlikde eýranly birnäçe lider öldürildi.
Tähran Ysraýyla we ABŞ-nyň Aýlag ýurtlaryndaky harby merkezlerine hüjüm gurady.
Eýran häzire çenli Bahreýni, Yragy, Iordaniýany, Kuweýdi, Omany, Katary, Saud Arabystany we Birleşen Arap Emirliklerini nyşana aldy.
