ABŞ-nyň Prezidenti Donald Tramp, amerikan gämileriniň duşenbe gününden başlap bitarap daşary ýurtly gämileriň howpsuz ýagdaýda Ormuz bogazyndan geçmegine ýoldaşlyk etmäge başlajakdygyny habar berdi we bu başlangyjy “gumanitar žest” hökmünde häsiýetlendirdi.

Başlangyjy “Azatlyk taslamasy” hökmünde häsiýetlendiren Tramp, sebitde galan gämileriň esasy zerurlyklarynyň azalandygyny belledi.

Ysraýylyň Kan Nýus teleýaýlymyna beýannama beren Tramp, Eýranyň söweşiň bes edilmegi üçin hödürlän teklibini seljerendigini belledi we teklibi “kabul edilmesiz” hökmünde häsiýetlendirdi.

Trampyň ady agzalýan teklibi kabul etmändigine garamazdan ABŞ ýekşenbe güni Tähranyň soňky 14 maddalyk teklibine jogap hökmünde täze teklip hödürledi.

Beýleki tarapdan ABŞ-nyň Merkezi güýçler serkerdeligi “Azatlyk taslamasy” hökmünde atlandyrlan başlangyja goldaw berdi we 4-nji maýdan başlap goranyş maksatly missiýa goldaw bermäge başlajakdyklaryny mälim etdi.

Ady agzalýan missiýa gönükdirilýän raketa ýok edijileri, 100-den gowrak uçary we 15 müň esgeri öz içine alýar.

ABŞ-nyň Merkezi güýçleriniň serkerdesi Bred Kuper “Goranyş maksatly missiýa berýän goldawymyz sebitleýin howpsuzlyk için diýseň möhüm” diýdi.

Ormuz bogazynda dartgynlyk möwjeýär

Bu beýannama, Britaniýanyň Deňiz söwdasy operasiýalar gullugynyň tanker gämisiniň Birleşen Arap Emirlikleriniň Fužairah şäherinden 125 kilometr alysda nyşana alnandygyny mälim etmeginden soň berildi.Hüjümiň sebäbi heniz doly bilinmeýär.

Beýleki tarapdan Eýranyň Milli howpsuzlyk geňeşiniň başlygy Ibrahim Azizi, Trampyň soňky çykyşyndan soň ABŞ-nyň Ormuz bogazynda haýsydyr bir meselä goşulşan halatynda degişli gaýtawulyň görkeziljekdigini aýan etdi.