Saud Arabystany bilen Türkiýe özara söwda mukdaryny 10 milliard dollara ýetirmegi maksat edinýär
Türkiýe Respublikasynyň Söwda ministri, Türkiýe bilen Saud Arabystanynyň arasynda baglaşyljak şertnamalaryň özara gatnaşyklaryň pugtalanmagyna itergi berjekdigini aýtdy.
Sişenbe güni Riýatda Türkiýe Respublikasynyň Prezidenti R. T. Erdoganyň Saud Arabystanyna gurajak saparynyň öňüsyrasynda Saud Arabystany-Türkiýe maýa goýum forumy geçirildi.
Saud Arabystanynyň Maýa goýum ministri Halid bin Abdulaziz al-Falih forumyň açylyş dabarasynda eden çykyşynda, Prezident R. T. Erdoganyň Saud Arabystanynda saparda boljakdygyny aýtdy.
Saparyň özara gatnaşyklaryň pugtalandyrylmagyny maksat edinýändigini aýdan al Falih, Saud Arabystany bilen Türkiýäniň özara gatnaşyklary pugtalandyrmak bilen strategik hyzmatdaşlyk derejesine götermegi maksat edinýändigini belledi.
Foruma Saud Arabystany bilen söwda, ykdysadyýet we maýa goýum ugurlary boýunça edýän gatnaşyklaryny ösdürmek isleýän 200 firmadan gowrak türk firmasynyň ýolbaşçylarynyň gatnaşýandygyny aýdan al Falih “Türkiýeden şeýle uly wekiliýetiň gatnaşmagy iki ýurduň arasyndaky strategik hyzmatdaşlygy we ykdysady gatnaşyklary pugtalandyrmagy maksat edinýän hususy pudagyň rolyny görkezýär” diýdi.
Özara söwda mukdarynyň 10 milliard dollara ýetirilmegi maksat edinilýär
Forumda çykyş eden Türkiýe Respublikasynyň Söwda ministri Ömer Bolat, Türkiýe bilen Saud Arabystanynyň arasynda özara söwda mukdaryny gysga möhletde 10 milliard dollara ýetirmegi maksat edinýändiklerini aýtdy.
Ömer Bolat, Prezident Erdoganyň Saud Arabystanyna gurajak saparynyň çäginde dürli ugurlar boýunça birnäçe şertnamanyň baglaşyljakdygyny aýtdy.
Ministr Bolat, şol şertnamalaryň Türkiýe bilen Saud Arabystanynyň arasyndaky gatnaşyklaryň pugtalanmagyna itergi berjekdigini belledi.
Ömer Bolat, iki lideriň gysga möhletde özara söwda mukdaryny 10 milliard dollara, uzak möhletde bolsa 30 milliard dollara ýetirmegi maksat edinýändigine ünsi çekdi.
Ömer Bolat, iki ýurduň arasyndaky häzirki söwda mukdarynyň 8,6 milliard dollardan geçendigini ýatlatdy.