Ysraýylyň hüjüminiň “hassahananyň hirurgiýa bölümine uly zeper ýetirendigini, iki adamyň ýogalandygyny we 8 adamyň ýaralanandygyny” nygtan Tedros Ghebreýesus, duşenbe güni X sosial media platformasyndan beren habarnamasynda, “35 düşege zeper ýetirildi, onsuz hem agyr günleri başdan geçirýän saglygy goraýyş ulgamynyň işini has-da kynlaşdyrdy” diýdi.
“Saglygy goraýyş ulgamy nyşana alynmaly däl, eýsem goralmaly we harby maksatly ulanylmaly däl” diýen Tedros Ghebreýesus, Bütindünýä Saglygy goraýyş guramasynyň ýesirleriň boşadylmagy we atyşygyň bes edilmegi üçin ýene-de bir gezek çagyryş berýändigini ýatlatdy.
Ýekşenbe gijesi Palestinanyň Saglygy goraýyş ministrliginden berlen beýannamada, Ysraýylyň harby goşunynyň Gazanyň günortasynda ýerleşýän hassahanany bombalamagy sebäpli azyndan 2 palestinalynyň ýogalandygyny, birnäçe adamyň ýaralanandygyny mälim edipdi.
Hassahananyň hirurgiýa bölüminiň nyşana alynandygyny mälim eden Palestinanyň Saglygy goraýyş ministrligi, hüjümde ýogalanlardan biriniň16 ýaşyndadygyny, ýaralananlaryň arasynda hassalaryň we saglygy goraýyş işgärleriniň bardygyna ünsi çekdi.
Ysraýylyň harby goşuny, ýanwar aýynda güýje giren atyşygyň bes edilmegi we ýesir çalşygy baradaky ylalaşyga garamazdan 18-nji martda Gaza garaşylmadyk ýagdaýda hüjüm gurap azyndan 730 adamy öldürdi, 1200 adamy hem ýaralady.
