TRT tarapyndan dünýäniň öňdebaryjy şahsyýetleriniň gatnaşmagynda 2017-nji ýyldan bäri geçirilýän TRT World Forum, halkara dialoga goşant goşmaga dowam edýär.

Prezident R. T. Erdoganyň gatnaşmagynda Stambul Kongres merkezinde öz işine başlan forumyň çäginde alymlar, žurnalistler, türgenler, sungat ussatlary, syýasatçylar we jemgyýetçilik guramalarynyň wekilleri dünýäniň gün tertibinde esasy orun eýeleýän meseleleri ara alyp maslahatlaşar.

Forumyň açylyş dabarasynda Prezident R. T. Erdogan, Prezidentiň ýanyndaky Kommunikasiýalar edarasynyň başlygy Burhanettin Duran bilen TRT-niň Baş müdüri Mehmed Zahid Sobajy çykyş etdi.

Wise-prezident Jewdet Ýylmaz, “Türkiýe: Sebitleýin güýçden sebitleriň arasynda täsirli aktýora” atly oturluşykda, Milli howpsuzlyk gullugynyň başlygy Ibrahim Kalyn bolsa “Halkara hukugyň we ynsanperwer çökgünligiň çatrygynda Gaza” atly oturluşykda çykyş eder.

TRT World Forumyň 10-njy ýylynda dünýäde üýtgeýän güýç deňagramlylygy we liderlik garaýşy ara alnyp maslahatlaşylýar.

Soňky 10 ýylda 86 sanysy açyk, 76 sanysy ýapyk görnüşde geçirlen oturluşykda 801 adam çykyş etdi. Oturluşyklara müňlerçe adam gatnaşdy.

Forumda halkara we sebitara meseleler ara alnyp maslahatlaşylýar.

Emeli aň, energiýa krizisileri, halkara hukuk we ykdysadyýet meselesi şu ýylky forumyň gün tertibinde esasy orun eýeleýär.

Forumyň çäginde şu ýyl “Türkiýe: Sebitleýin güýçden sebitleriň arasynda täsirli aktýora”, “Howply diplomatiýanyň özgerişi: Merkezi güýçler we köp merkezli dünýä ulgamy”,  “Halkara ulgamda Amerikan paradoksy”, “Ýakyn Gündogardaky söweşden soň milli ykdysadyýetler” we “Emeli aň döwründe jogapkärçiligi dolandyrmak” ýaly birnäçe oturluşyk geçirler.

Foruma gatnaşyjylar şeýle hem Russiýa-Ukraina söweşinden Afrikadaky diplomatiýa we geo ykdysadyýete çenli birnäçe meseläni ara alyp maslahatlaşar.