ABŞ-nyň prezidenti Donald Tramp çarşenbe güni Eýran bilen iki hepdelik ýaraşygy ýola goýmak baradaky täze ylalaşykdan soň ABŞ-nyň Ormuz bogazyndaky gatnawlary ýeňilleşdirmäge kömek etjekdigini aýtdy.
Tramp “Truth Social” platformasyndan beren beýanatynda: “Örän oňyn ädimler bolar! Köp pul gazanylar. Eýran täzeden gurmak tapgyryna başlap biler. Biz ähli enjamlary ýükläp, ähli zadyň gowy geçmegini üpjün etmek üçin “şol ýerde garaşarys” diýip belledi.
Sişenbe güni Eýrana garşy bombaly hüjümleri iki hepde togtatmak barada ylalaşandygyny yglan etmezden öň, Tramp Eýrana Gündogar wagty bilen agşam sagat 20:00-a çenli Ormuz bogazyny gatnaw üçin açyp, ylalaşyga gelmäge wagt berdi; ýogsam, infrastrukturasyna hüjümleriň guralmaga başlanjakdygyny aýdypdy.
ABŞ-nyň Prezidenti bu pursady mümkin bolan "Ýakyn Gündogaryň Altyn Asry" hökmünde häsiýetlendirdi we bu ABŞ-nyň möhüm deňiz ýolunyň howpsuzlygyny üpjün etmek boýunça tagallalarynyň dowam etjekdigini alamatlandyrdy.
Sebitdäki dartgynlyk 28-nji fewralda ABŞ-nyň we Ysraýylyň Eýrana garşy başladan bilelikdäki hüjüminden soň has hem artdy, hüjümlerde ýurduň şol wagtky dini lideri Ali Hameneýi bilen birlikde 1400-den gowrak adam ýogaldy.
Eýran öç almak üçin Ysraýyla, şeýle hem ABŞ-nyň harby we maliýe aktiwleriniň ýerleşýän ýurtlary bolan Iordaniýa, Yraga we Pars aýlagy döwletlerine garşy uçarmansyz howa ulagy we raketa hüjümlerini amala aşyrdy, şeýle hem gämileriň Ormuz bogazyndan geçmegini çäklendirdi.
