Türkiye anna güni Ysraýylyň milli aňtaw gullugy Mossad üçin işleýänlikde güman edilýän hususy detektiwi tussag edendigini habar berdi. Howpsuzlyk resmileriniň maglumatyna görä, güman edilýän şahs Stambulda prokurorlar we polisiýa bilen bilelikde geçirilen operasiýanyň dowamynda tussag edildi.
Türkiyäniň Milli Howpsuzlyk gullugy operasiýanyň “Metron işleri” kody bilen geçirilendigini we güman edilýän şahsyň Serkan Çiçek ady bilen tanalýandygyny, onuň şol operasiýanyň dowamynda tussag edilendigini mälim etdi.
Howpsuzlyk resmileri Serkan Çiçegiň Mossad üçin işleýändigini we Ysraýylyň Onlaýn Operasiýalar Merkeziniň agzasy Faýsal Raşid bilen aragatnaşykda bolandygyny aýtdylar.
Çiçek, Raşidiň haýyşy boýunça Ysraýylyň Ýakyn Gündogar syýasatlaryna garşy çykyş bolan bir palestinaly aktiwistiň Stambuldaky hereketlerini yzarlandygyny boýun aldy.
Türk aňtaw gullugynyň maglumatyna görä, Çiçegiň hakyky ady Muhammet Fatih Keleş bolup, ol bergä batandan soň adyny üýtgedip we işewürlik karýerasyny taşlapdyr we soň bolsa, 2020-nji ýylda Pandora Detektiw Agentligi atly hususy firmany esaslandyryp,
Ol Ysraýyl üçin içalylyk edenligi üçin 19 ýyl azatlykdan mahrum edilen Musa Kuş we jemgyýetçilik ýazgylaryndan şahsy maglumatlary detektiwlere satmakda günäli tapylan aklawçy Tugrulhan Dip bilen işleşipdir.
Güman edilýän şahsa kriptowalýutada töleg amala aşyryldy
Resmileriň aýtmagyna görä, Çiçek detektiw işine başlanyndan soň Mossadyň ünsüni özüne çekipdir. 31-nji iýulda Raşid ony WhatsApp arkaly habarlaşyp, özüni daşary ýurt hukuk firmasynda işleýän işgär hökmünde tanyşdyrypdyr.
Raşid Çiçegi Stambulyň Başakşehir etrabynda ýaşaýan bir palestinaly aktiwistiň hereketlerini dört günläp yzarlamak wezipesini beripdir. Çiçek bu işi ýerine ýetirmek üçin 1-nji awgustda kriptowalýutada 4000 dollar töleg alypdyr.
Çiçek internet arkaly adyny gözläp, ol adamyň palestinaly aktiwistdigini öwrenipdir. Kuşyň Ysraýyl üçin içalylyk edenligi üçin tussag edilendigini bilýänine garamazdan, ol bu işi kabul edipdir.
Resmileriň aýtmagyna görä, Çiçek Raşidiň beren salgysyna baryp, nyşany tapyp bilmändir. Ol 1-2-nji awgust aralygynda jaý kireýine almak bahanasy bilen ýaşaýyş toplumyna girip, gözleg işlerini geçiripdir, emma Mossadyň talap eden maglumatlaryny ýygnap bilmändir.
Resmileriň habar bermegine görä 3-nji awgustda Ysraýylly içaly Raşid aragatnaşygy kesipdir.
