Anna güni Mýanmanyň orta zolagynda başdan geçirilen güýçli ýer titremede, Htet Min Oo Remezan namazyndan ozal Mandalaý sebitindäki öýüniň golaýynda täret alýardy.
Öýi we metjidiň bir bölegi ýer titremede çökdi, özi bolsa harabalyklaryň aşagynda galdy we diwaryň bölekleri iki daýzasynyň üstüne gaçdy. Mähelläniň ýaşaýjylary olary çykarmaga synanyşdy, emma diňe birini çykaryp bildirler.
Htet Min Oo 25 ýaşynda, iki agasynyň we enesiniň hem harabalyklaryň aşagynda galandygyny habar berdi. Agyr enjamlar bolman soň, elleri bilen gazmaga synanyşdylar, emma edenleri şowsuz boldy.
Ol: “Olaryň diri bolup-bolmandygyny bilmeýärin. Munça wagt geçdi, emma mundan soň umyt ýok diýip pikir edýärin. Örän uly weýrançylyk bar we hiç biri bize gelip ýetmedi” diýdi. Onuň sesi titredi we aglady. Mukaddes Oraza aýynda Juma namazy üçin metjitlere ýygnanan ýüzlerçe musulman raýatyň hem ýer titremede ýogalan bolup biljekdikleri aýdylýar.
Yzda galanlar
Mandalaý sebitinde 39 ýaşyndaky bir adam, Sule Kone obasynda ýumrulan binanyň harabalyklarynyň aşagynda galan bir adamy halas etmäge synanyşan mahaly bolan ýer titreme sebäpli gaçmaga mejbur galandygyny beýan etdi.
Adynyň aýan edilmegini islemeýän adam: “Ony ol ýerde goýmaga mejbur galdym. Ikinji gezek içine girdim we ony halas etmäge synanyşdym. Öz ellerim bilen 4 adamy harabalyklaryň aşagyndan çykardym. Emma gynansagam şol adamlaryň 3-si şonsuz hem ölüpdir, 1-i bolsa elimde ýogaldy” diýdi.
Ol ady agzalan obada 3 aýry metjidiň ýumrulmagy netijesinde 23 adamyň ýogalandygyny we diňe öz etrapçasynda 10 adamyň ýogalandygyny habar berdi. Döwlet tarapyndan girizilen çäklendirmeleriň netijesinde metjitleriň berkidilmegine rugsat berilmändigini beýan etdi.
Mýanmada musulmanlara garşy basyşlar
Esasy ilaty buddist bolan Mýanmada musulmanlar eýýäm ençeme wagt bäri çetleşdirilýär, aşa milletçi toparlaryň we radikal monahlar tarapyndan zorluklara sezewar galýarlar.
Mýanmanyň resmileri musulmanlaryň täze metjitleri gurmagyna we bar bolan metjitleriň abatlanmagyna päsgel berýärdi. ABŞ-nyň döwlet departamentiniň 2017-nji ýylda taýýarlan habarnamasyna görä gadymy metjitler ençeme ýyl bäri abatlanmaklaryna rugsat berilmändigi üçin erbet ýagdaýda.
