Polisiýa gullugy deslapky barlaglardan soň, elektrik desgasyndaky wakany şübheli hasaplamaýandyklaryny, emma derňewleriň dowam edýändigini habar berdi.
Londondaky Hitrou howa menzili elektrik desgasynda ýüze çykan ýangyndan soň, şenbe güni doly ýagdaýda ýaňadandan hyzmat bermäge başlady. Ýewropanyň iň gelim-gidimli howa menzilleriniň biri bolan Hitrou howa menziliniň ýapylmagy global syýahata uly derejede zeper ýetirdi.
Awiasiýa pudagy howa menzilini elektrik tok bilen üpjün edýän elektrik tok desgasynda ýüze çykan uly ýangyndan soň ýolagçylary ugrukdyrmak we uçuş meýilnamalaryny ýaňadandan düzgünleşdirmek üçin işe girişdi.
Anna güni agşam käbir uçar saparlary ýaňadandan başlapdy, emma dünýäniň iň işjeň 5-nji howa menziliniň biri bolan bu howa menziliniň uly böleginiň ýapyk bolmagy sebäpli, on müňlerçe ýolagçy myhmanhanalarda ýer gözlemäge ýa-da goşmaça uçar saparlayryny gözlemäge mejbur galypdylar. Howa ýollary kärhanalary uçarlaryny we ekipažyny ýerlerine gaýdyp getirmek üçin uly tagalla etdiler, ol bolsa logistika krizisine sebäp döretdi.
Londondaky Hitrou howa menziliniň metbugat geňeşçisi beren beýanatynda, bökdençlikleriň ýaramaz täsir ýetiren ýolagçylara kömek bermek üçin toparlaryň iş alyp barýandygyny aýtdy
Metbugat geňeşçisi: "Biz terminallarymyza ýüzlerçe goşmaça işgärleri goşduk we goşmaça 10000 ýolagçynyň howa menzilinden geçmegini üpjün etmek üçin şu günki uçuş tertibine goşmaça uçuşlary goşduk" diýip belledi.
Jogapkärçilik çekeleşigi
Awiasiýa pudagy, millionlarça funt sterling çykdaja sebäp bolan bökdençlikden soň şeýle möhüm infrastrukturanyň ätiýaçlyk ulgamy bolmazdan näme üçin işleýändigini gün tertibe getirdi.
IATA-nyň başlygy we British Airways howa ýollary kärhanasynyň ozalky ýerine ýetirjiler geňeşiniň başlygy Willi Uolş: “Ol howa menziliniň aça-açan bir meýilleşdiriş ýalňyşlygydyr” diýdi.
Howa menzili anna güni 1351 uçar saparyny amala aşyrmagy we takmynan 291 000 ýolagça hyzmat bermegi meýilleşdirýärdi. Emma uçarlar Beýik Britaniýanyň we Ýewropanyň beýleki howa menzillerine gönükdirildi, ençeme uzak aralykly uçarlar başlangyç nokatlaryna yzyna dolanyp gelmäge mejbur galypdylar.
Ýangyndan soň başladylan derňew işi dowam edýär
Polisiýa gullugy deslapky derňewleriň netijesinde şübheli bir ýagdaýyň bolmandygyny, emma derňew işiniň dowam edýändigini mälim etdi. Londonyň Ýangyn söndüriji gullugy bolsa derňewlerde elektrik paýlaýyş enjamlaryna ünsleriň jemlenjekdigini aýtdy.
Soňky ýyllarda Hitrou we Londondaky beýleki uly howa menzilleri awtomatlaşdyrylan gapy ulgamlaryndaky näsazlyklar we howa hereketini dolandyrmak ulgamlaryndaky çöküşler bilen birlikde biri-birinden tapawutly tehniki bökdençliklere sezewar galypdy. Soňky gezek bolsa 2023-nji ýylda başdan geçirilen bu wakalar, awiasiýa pudagynda uly bökdençliklere sebäp bolupdy.
