Amerikan CNN teleýaýlymyna beýannama beren ysraýylly çeşme, hüjümde Eýranyň energiýa infrastrukturasynyň we ýokary derejeli resmileriniň nyşana alynyp bilinjekdigine ünsi çekdi.
Habarda hüjümiň parahatçylyk gepleşiklerinde Eýranyň egilşik etmegi üçin basyş edilmegini maksat edinýändigi nygtaldy.
Habarda hüjüm kararynyň ABŞ-nyň Prezidenti Donald Trampa baglydygy ýatladyldy.
ABŞ-nyň “Azatlyk taslamasy”
ABŞ-nyň Prezidenti Donald Tramp 4-nji maýda Ormuz bogazynda galan we Ýakyn Gündogardaky krizis bilen arabaglanşygy bolmadyk ýurtlara degişli gämileriň howpsuz ýagdaýda bogazdan geçmegine ýoldaşlyk etmäge başlajakdyklaryny mälim edipdi we bu başlanjy “Azatlyk taslamasy” hökmünde häsiýetlendiripdi.
ABŞ-nyň Merkezi güýçler serkerdeligi CENTCOM etaba 15 müň esger we 100-den gowrak gury ýer we deňiz ulagy bilen goldaw berjekdiklerini mälim edipdi.
Ormuz bogazyndaky dartgynlyk
Eýranyň Ormuz bogazyndan geçmäge çalşan ABŞ-nyň deňiz güýçlerine degişli bir gämini 2 raketa bilen nyşana alandygy habar berildi.
Eýranyň ýarym resmi “Tesnim” habarlar gullugynda berlen habarda, Eýranyň harby goşunynyň ABŞ-nyň deňiz güýçlerine degişli gämini nyşana almagy barada giňişleýin maglumat berlipdi.
Habarda ABŞ-na degişli gäminiň radaryny ýapyp Ormuz bogazyna golaýlandygy ýatladylypdy.
Eýran tarapyndan gämä ylalaşygy bozandygy barada duýduryş berlendigi emma gäminiň duýduryşlara gulak asmandygy sebäpli raketa atylandygy nygtalypdy.
ABŞ-nyň Merkezi güýçler serkerdeligi bolsa Eýranyň ABŞ-na degişli harby gämini nyşana alandygy hakyndaky habarlaryň asylsyzdygyny öňe sürüpdi.
