Sebit resmileri tarapyndan çarşenbe güni berlen beýanatda, Ukrainanyň uçarmansyz howa ulaglarynyň gijeki hüjümleriniň Moskwany nyşana alandygyny we Russiýanyň paýtagtynyň günortasynda ýerleşýän Tula sebitindäki senagat zolagynda ýangynyň döremegine sebäp bolandygyny habar berdiler.

Moskwanyň şäher häkimi Sergeý Sobýanin Telegramdan beren beýanatynda, Moskwany nyşana alan azyndan üç uçarmansyz howa ulagynyň urlup düşürilendigini aýan etdi. Sobýanin hüjüm guralan ýerlere gyssagly kömek gulluklarynyň iberilendigini, ilkinji maglumatlara laýyklykda hiç hili zyýanyň habar berilmändigini aýtdy. Russiýanyň Raýat awiasiýa gullugy paýtagta hyzmat berýän dört esasy howa menziliniň ikisinde işleriň çäklendirilendigini yglan etdi.

Russiýanyň Goranmak ministrligi gije 172 sany ukrain uçarmanyz howa ulagynyň ýok edilendigini, olaryň takmynan ýarysynyň Ukrainanyň serhedine golaý ýerlerde urlup düşürilendigini aýan etdi.

Tulanyň gubernatory Dmitriý Milýaýew urlup düşürilen uçarmansyz howa ulaglarynyň galyndylarynyň sebitdäki senagat desgasynda ýangyna sebäp bolandygyny habar berdi, ýöne desga barada jikme-jik maglumat bermedi. Milýaýew sebitde howadan goranyş ulgamlary tarapyndan 12 sany ukrain uçarmansyz howa ulagynyň ýok edilendigini habar berdi.

Ukraina Russiýanyň dowam edýän agressiýasyna jogap hökmünde Moskwanyň söweş ukybyna päsgel bermek maksady bilen, Russýanyň territoriýasynyň çägine uçarmansyz howa ulaglary bilen guraýan hüjümlerini artdyrdy we harby, energiýa we logistika desgalaryny nyşana alýar.