ABŞ-nyň Prezidenti Donald Tramp, ýadro ýaragyny synagdan geçirýän ýeke-täk ýurduň Demirgazyk Koreýa bolmandygyny, Russiýa bilen Hytaýyň hem ýadro synagyny geçirýändigini öňe sürdi.
CBS Nýusyň 60 minut gepleşigine gatnaşan Tramp möhüm beýannama berdi.
Gepleşigi alyp baryjy Norah O’Donneliň Demirgazyk Koreýanyň ýadro ýaragyny synagdan geçirýän ýeke-täk ýurtdygy hakyndaky garaýşy barada durup geçen Tramp, “Russiýa ýadro ýaragyny synagdan geçirýär, Hytaý hem synag geçirýär, emma hiç hili maglumat bermeýär” diýdi.
ABŞ-nyň Prezidenti Trampyň 30 ýyl soň ýadro ýaraglarynyň synagdan geçirilmegi etabynyň gaýtadan başladylmagy barada görkezme bermeginden 3 gün soň beren beýannamasy ünsleri özüne çekdi.
“Beýleki ýurtlar synag geçirýär. Biz synag geçirmeýän ýeke-täk ýurt we ýeke-täk ýurt bolmak islemeýärin” diýen Tramp, şol ýurtlaryň ýaraglaryny nirede synagdan geçirýändiklerini bilmegiň mümkin däldigini belledi.
“Ägirt uly ýadro güýç”
Ýadro ýaraglaryny ulanmak islemeýändigini ýene-de bir gezek nygtan Tramp, emma şol ýaraglaryň nähili işleýändigini görmek üçin synagyň geçirilmelidigini belledi.
Tramp, “Siz ýadro ýaragyny öndürýärsiňiz, emma synag geçirmeýärsiňiz. Onuň işläp işlemändigini nädim biljek?” diýdi.
ABŞ-nyň ägirt uly ýadro güýje eýedigini nygtan Tramp “Russiýa sanawda ikinji ýerde, Hytaý bolsa üçünji ýerde durýar, emma 5 ýylyň dowamynda deň derejä gelerler. Olar ýadro ýaragyny öndürmäge dowam edýär, ýadro ýaragsyzlanma boýunça gyssagly işe girişilmeli”diýip belledi.
